U tišini smrčevih šuma Nacionalnog parka Prokletije, daleko od očiju javnosti, svakodnevno rade ljudi čiji je zadatak da očuvaju prirodu od jedne od najopasnijih šumskih prijetnji – potkornjaka. Ovaj štetni insekt može za kratko vrijeme da uništi desetine hektara zdrave šume, a njegova pojava u posljednjim godinama postala je ozbiljan izazov za očuvanje šumskih ekosistema.

 

Tim Službe zaštite NP Prokletije odigrao je ključnu ulogu u 2024. i 2025. godini u borbi protiv ove štetočine, sprovodeći niz stručnih i tehničkih mjera za rano otkrivanje, kontrolu i suzbijanje potkornjaka u smrčevim šumama.

 

Ko su ljudi na terenu?

Ovo su iskusni terenski radnici i šumarski stručnjaci, koji rade u teškim uslovima planinskog terena, često po kiši, snijegu i jakom suncu. Njihova imena možda nijesu poznata javnosti, ali njihov doprinos je neprocjenjiv:

 

·  Eldin Gutić, inženjer šumarstva i koordinator terenskih aktivnosti,

·  Muamer Lalić – Šef Službe zaštite

·  Orhan Musić – referent za šume

·  Nedžad Šarkinović, Darko Jokić, Salih Čelić, Jasmin Radončić, Miralem Markišić, Adis Purišić i Hamid Cecunjanin – nadzornici sa iskustvom u radu u planinskim predjelima.

 

Šta tačno rade?

 

 

Postavljanje feromonskih klopki

Tokom proljeća i ljeta, kada je aktivnost potkornjaka na vrhuncu, tim postavlja feromonske klopke na odabranim lokacijama. Ove klopke sadrže specijalne supstance (feromone) koje simuliraju miris ženki potkornjaka i na taj način privlače mužjake – funkcionišući kao biološka "zamka".

 

Monitoring – svakodnevna terenska kontrola

Kada se klopke postave, tim redovno obilazi lokacije i prati broj ulovljenih jedinki, kao i prisustvo novih tragova zaraze na stablima. Monitoring se vrši vizuelno i analitički, bilježenjem preciznih podataka o broju jedinki i položaju klopki.

 

Pražnjenje, brojanje i uništavanje jedinki

Klopke se pravovremeno prazne, a ulovljeni potkornjaci se ručno broje i katalogizuju – podaci se unose u baze, kako bi se pratila dinamika populacije štetočina. Nakon brojanja, jedinke se termalno ili mehanički uništavaju, kako ne bi došlo do daljeg širenja.

 

Analiza podataka i predlaganje mjera

Na osnovu prikupljenih podataka, tim izrađuje izvještaje i analize koje se dostavljaju nadležnim institucijama. Na taj način, omogućava se blagovremena reakcija i planiranje dodatnih mjera – uključujući sanitarnu sječu zaraženih stabala, čišćenje terena i edukaciju lokalnog stanovništva. 

 

Zašto je ovaj rad važan?

Potkornjak, iako malih dimenzija, može izazvati ogromne ekološke i ekonomske štete. Njegova pojava u smrčevim šumama predstavlja direktnu prijetnju za stabilnost ekosistema, jer uništava ne samo stabla, već i staništa mnogih zaštićenih biljnih i životinjskih vrsta.

 

Zahvaljujući predanom radu zaposlenih u Službi zaštite NP Prokletije, blagovremeno su identifikovana žarišta, sprovedene sve neophodne mjere i spriječeno širenje infestacije na veće površine.

 

                                                                                                                                                                                           mr Miralem H. Metjahić

Direktor NP Prokletije